North Garo Hills, Kharkutta jolni adita biaprangni ramarang nosto ong∙e dongengani a∙sel neng·nikaniko chagrongenganina A∙chik Holistic Awakening Movement (AHAM) Kharkutta Regional Unit, Chief Minister Conrad Sangma-na chitti sedoataha. AHAM dol aro Kharkutta jolni ma·aparang September 9 tariko bakrime nirok sandianiko dakon adita ramarang jekai Kharkutta bazaar PWD rama, Kharkutta Rewasing-oni Block re·gipa, Me∙gam A∙kong, Baghabatta bazaar-oni Do∙singkol rama, Kentra Baptist ramani sepango donggipa Lower Rongbu aro Kentra PWD rama, Baksalpara Na∙chirongdik-oni Baksalpara Govt. U.P School, Baksalpara-oni Arbelpara ramarang aro gipin gamchatgipa ramarangni nosto ong∙aniko ma·sina man·aha. Ia ramarang namjabeahani gimin ta·rake taridape on·aniko nangchongmotenga ine uamang parakataha.
Kharkutta jolni ian mongsonggipa ramarang ong·ani a·selo salanti re·rurana nange dingtang dingtang gadangni manderang chong·motan ge·e game cha·giparang, chatro chatrirang, te·rik, gui, sal·a aro gipin chonchona bading chiwale cha·giparangna neng·nikaniko on·enga. Ramarang namjabeaniko songdongenggipa manderang ta·rake tarichina changni chang mol·molahaoba daito gnanggipa department knachakgija dongenga ine AHAM dol parakataha. Ia ramarangkon sorkari office-rango kam ka·giparangba bilsiantian kamtangona re·rurana jakkalenga. Social media-rango manderangni ia namgijagipa ramarangko re·e garitangrangko biltangchi sikdugipa video-rangni giprororanikoba uamang chittio janapatjolaha.
Te·rik badinge cha·giparang Assam Daranggiri antidamona cycle-rango ra·ange pale sim·e cha·na ramarang namjabeani a·selo neng·nikaniko man·enga. Ramarang chibilok a·bilok dake rimilbeani gimin uamang pick-up garirangosa ra·angskana nangenga jean korosrang bata ine AHAM dol parakataha. Indake ong·enganichi ge·e game aro bading chiwale cha·giparang kamtangko galchipna nangao ga·akenga aro janggi tangna gipin chel·bea a·dokrangchi company-rango kam ka·e cha·aona soktokenga. Apsandaken, skul aro college re·gipa bi·sarangba scooty aro bike-rangko re·rurana jakkalani gimin a·selrango ga·ake neng·nikaniko man·enga ine uamang janapataha.
Ia pilak ong·enggipa obostarangko niate sakantini namgnina Kharkutta jolni gamchatgipa ramarangko ta·rake tarina tangka paisarangko chamatchina aro nirokatchina AHAM dol Chief Minister-ko mol·molataha.
