All Meghalaya SSA School Teachers’ Association (AMSSASTA) aro All Garo Hills SSA School Teachers’ Association (AGHSSASTA), SSA skigiparangni dormahako 100% bariatchina dabie Chief Minister Conrad K. Sangma-na chitti sedoataha. Ia dabianiko September 7 tariko AMSSASTA aro AGHSSASTA apsan bakrime Mount Hermon Higher Secondary School, Nongstoin-o tom∙e tik ka∙angaha.
SSA skigiparangni dabianiko September 30 tarikni gisepon kam ka∙e on∙china u∙iatangan baksana uamangni dongimin somoio ia dabianiko knachake chu∙sokatjagenchimode a∙dok gimiko jingjengatnagita chittio janapataha. Uamangni dormahako batanggimin 2016 bilsio bariataonin da∙o bilsi 8 ong∙piloba bariataikujaenga ine u∙iatangaha. Indake ong∙engon somoini kri bosturangni dam baririkrikengani gisepon uamangni dormaharang salantio nangenggipa bosturangko brena aro nokdangko rikanio chu∙ongjaenga ineba janapangaha.
Indake SSA skigiparangni neng∙nikanirangko nikgrikate dongimin somoi Sept 30 tarikna skang uamangni dormahako 100 percent bariatchina AMSSASTA aro AGHSSASTA-rang CM Conrad Sangma-ko mol∙molangaha.
