North-Eastern Hill University (NEHU)-ni gital grading system-ko a∙bachengatanina suk ong·jae sak 100 mangna batpile chatro chatrirang bimungtangtangko on·e NEHU-ni Vice Chancellor (VC)-na chitti see jagalataha. Ia gital grading system-ko ra·gatna 2023 bilsini February jao u·iatangaha jeon 40 mark-na komigipana Fail (F), 40-49 man·gipana Pass (E), 50-59 man·gipana Average (D), 60-69 man·gipana Good (C), 70-79 man·gipana Very Good (B), 80-90 man·gipana Excellent (A) aro 90-100 man·gipana Outstanding (O)-ko on·a tik ka·angaha.
NEHU-ni VC-na on·atgipa chittio janapatanigitade, ia gital grading system-ko u·iatmanahaoba iako ra·gatanichi chatro chatrirangni mikkangchi janggi tanganio neng·nikaniona ra·bana kensoani gnang ine uamang aganangaha. Unbaksana gitcham grading system-ode 45-54 mark man·gipana C grade-ko on·ronga jeon gital grading system-ode C grade-ko man·agita 60-69 mark-rangko nangskaengaha ine janapataha. Indake dal·bea dingtangataniko ra·bae 60 percent man·gipa chatroko 45 mangmang man·aigipa baksa apsan gadangona donataniara kragipa ong·ama ineba uamang sing·doangaha.
Ia gital grading system-ko 2023-24 bilsioni ra·gatna miksonganiko ia bilsini June jao tik ka·angahaoba, je chatro chatrirang VC-na chittiko sedoataha uamang 2022 bilsio napgiparangsa ong·ani gimin uamangni porikka seani result-o ong·gijagipa grading system-ko jakkale komia mark-rangko on·aha ineba u·iatangaha.
