Mijal salni bako GHADC-ni Executive Committee, toromni dilgiparang, NGO-rang aro senior citizen-rang baksa tom·e chanchirime dormaharangko on·a tik ka·aniko NGEA dolrangni ra·chakjanina, batanggimin somoirangonin ku·chakgimin dormaharangko on·baenga aro 5th pay-ko on·a chinga dingtang dingtang kamrangko ka∙na jotton ka·enga ine Deputy CEM Nikman Marak aganangaha. Unbaksana an·ching Sixth Schedule ga·akgipa biapo donggenchimoba skango Assam a·dokni ning·o ong·miting Sixth Schedule-gita ong·jaha aro Meghalaya a·dokko man·ani ja·man autonomy ba jakgitel ong∙e kam ka∙aniko man·anide bimingnasan ong·aia indiba kamchide ong·na man∙kujaenga ineba Marak aganangaha.
Indake ong·engon niamrangko tarina Governor-na joljol watatna man·ja maina skanggipa District Council Affairs (DCA)-ona sokatchengesa law department-ona watatchengna nanga. Land and revenue-ko 50 percent-ona tang·doatna 2021 bilsioni a·bachengate 2022 bilsini September jaosa Governor-ni soiko man·aha jekon 2023 bilsini March jao ra∙chakaniko man∙taiesa tang·doatna man·angaha ine Marak janapangaha. GHADC-o kam ka·giparangni man·a nanggniko tang·doatna inon chu·gimik autonomy-ko jean legislative autonomy aro financial autonomy-ko man·ja ineba Marak aganangaha.
Skangni somoio Transport aro gipin department-rangniko kajina gilaniko council-an dakna bil dongachim indiba da∙oni somoio a∙dok sorkarisa DTO-nigita kajinako gilenga jekon changni chang sorkarina lekka sedoatani ja∙manosa council-na kajinako sokatenga. Council-ni dongimin niam 3A paragraph-o janapgimingita land and revenue-chi GHADC-ko chu·gimik chalaina man∙e kajinarangko gilna man∙enga aro ia neng·nikanirangko chagronggenchimoba kajinarangko bariate name nipiltaianiko dake indita jarangni man·gnirangko da·alonaba on·baenga ine Marak aganangaha. Indake ia district council-ara A·chik jatni ong·ani gimin apsan nangrime kamrangko ka·na nanggen maina batanggimin chango a·dok sorkarini chitti seatanio district council-ara rural local body ong·jaha ine janapataha. Iani a∙selo tangka paisa chamatanirangko ma·mong sorkari komiatna jotton ka∙angani ja·mano ma·mong sorkariona re·ange changni chang golpogrikesa ia pilakkon namatpilna man·aha ine Marak janapangaha.
Iani gisepon 5th pay-na ja 2 ba ja 3 somoirangko ra∙dapaniara adita nanggipa kamrangko ka·na NGO aro toromni dilgiparangni mikkango ku·chakgiminko matchotani ja·mano 5th pay commission-nigita dormahako on·anggen ine Marak aganangaha. Unbaksana Council-na da∙o dipet kam ka∙giparangna dormaharangko gamna ma∙mong aro a∙dok sorkari tangka paisarangko chamata dongjani gimin je kajina gile man∙gipanikosa jakkalna nangenga ine u∙iatangaha. Mikkangchi State Finance Commission ko ra∙gatgenchimode indirect taxrangko jekon a∙dok sorkarini kajina gilgipanikoba council-naba bakko tikatna dakchakanggen ineba Deputy CEM Nikman Marak agandapangaha.
