East Garo Hills Nengkhra-o Eklavya Model Residential School (EMRS)-ko rikna pangchakani ro·ongko songaoni ru·uta bilsirangna rikchipkujaenganina songdongenggipa manderangni palo Nengkhra Regional Unit-ni GSU dolrang CM Conrad Sangma-na chitti seataha.
GSU dolrangni chittio janapatanigitade, EMRS-ko riknagita 2019 bilsini March 5 tariko Williamnagar-ni MLA aro Cabinet Minister Marcuise Marak pangchakani ro·ongko songe on·angaha. Ia project-ko ra·baanina Nengkhra aro wilwilao donggipa songrang kusi ong·en ra·chakangaha maina jolo skie ra·na namgipa bida pakwatchakram skulrang dongjani a·selo gipin biaprangchi re·e poraina nangaona sokatronga ine GSU dolrang janapataha.
Indake ong·genchimoba pangchakani ro·ongko songaoni bilsi bonga batpilahaoba ia skulko rika cho·anigita maming bimang dongkujan baksana iani bidingo maming koborrangba dongjaha ine u·iatangaha. Ia project-ni bidingo 2023 election-na skang NPP dolrang Williamnagar Constituency-o parakangaha jeon kamrangko ka·na WEBCOS-ni jako on·aha aro ta·raken rika cho·aniko a·bachengatgen ineba aganangaha.
Songdongenggipa manderangni poraia skiani a·bako namdapatna nangnike ru·uta somoirangna galchipaniara sorkarini kakket ong·e kam ka∙aniko sing·dona nangaona sokaha ine GSU dolrang janapataha. Unbaksana ku·chakgiminko indake rikchipgija donenganiara rike on·a miksongani donggija vote man·a mangmangsan aganangama ine sing·doaona sokengaha. Indake rikchipgija donaniara Nengkhrani manderangnasan ong·aigija EGH a·jao songdongenggipa sakantirangnaba neng·nikaniko ra·baani ong·a jeon namgipa skie ra·chakram skulrang namen komia ine GSU dol janapataha.
Indakgipa obostarang ong·engon, ia Eklavya Model Residential School-ni bidingo maming ru·utatani gri Nengkhra aro sepangjolo songdonggiparangna kakketgipa talataniko on·china GSU dolrang Chief Minister-ko dabiangaha.
