New Delhi-o bilsi 17-ni ning·o ong·gipa me·asarangni Subroto Cup Final-o Meghalaya dolrang Manipur baksa kal·susaanio chu·gimik somoio goal prakko chipgrike amgrikjae penalty tinggrikanio Manipur 4-3 goal-chi Meghalaya dolko amataha.
Kal·ani chu·gimik 70 minute-o Manipur dolrang nambee kal·e skanggipa goal-ko 31 minute-o corner tinganio chipna man·chengaha. Indake ong·genchimoba Meghalaya dolba jotton ka·bee somoi bon·a skang 69 minute-o goal chipskae apsangrik ong·na man·aha. Iani gisepon dolgni apsangrik ong·ani ja·mano somoiko ra·dape kal·atgija joljol penalty tingatangskaaha.
Penalty-ko tinggrikatanio Meghalaya dolrang changgni joljol napatjaha jeon Manipur dolba apsandaken changgni napatjae apsangrik 3-3 ong·taiaha. Indake ong·engon Manipur goalsako chipe ame dongsoaha jeon Meghalaya dol goal napatjae Manipur dolni jako ama cha·aha.
Meghalaya dolrang final-o amatako man·genchimoba uamangni kal·a gimiko changsamangba sirikgija Daman and Diu, Bihar, CISCE aro Arunachal Pradesh-ko ame final-ona sokdobaaha.
