Meghalaya State Legal Services Authority (MSLSA), Red FM 93.5 aro Education Department bakrime Garobhada aro Ampati bajar-o “Back-to-School” campaign-ko ong∙atangaha. Ia campaign-ko “Opening Doors For Education to Children” aro “Securing Free and Compulsory Education to Children of Meghalaya” katta bichongo pangchake a·jao songdongenggipa skul re·gija dongenggiparangko skul napatpilna didina miksonge ong·atangaha. Ia campaign-ko India-ni Constitution-o dongimin niam Article 21A-o bil gnanganiko u·iatan baksana dingtang dingtang neng·nikanirangko man∙e skul napgija dongenggipa bi∙sarangna aro a·jao songdongenggipa manderangna poraiani gamchataniko talate on∙e poraia skiani a∙bako tang∙doatna ong∙atangaha. Apsandaken bidako skie ra∙na dingtang dingtang cholrangni giminba agane National Institute of Open School (NIOS)-rango poraie skie ra∙na man∙ani bidingoba agantalatangaha.
Bidako skie ra∙aniara songsalo janggitanganioba namen nangchongmotgipa ong∙an baksana bi∙sarangko mikkangchi uamangni janggitanganio nokdango neng·nikanirangko chagronganio aro dambeoni jikse ra∙aoniko champengnagita ma∙a paarangko bi∙satangtangko skul napate bidako skie ra∙na cholko on∙chinagita didiangaha. Iani gisepon ma∙a paarangna poraie skie ra∙ani gamchataniko agantalate on∙an baksana skul re∙gija dongenggipa bi∙sarangko uamangni bilsini kri skulo napatpilna man∙agita toll-free helpline number 15100-ona call ka∙e u∙iatchina aro a∙jani Springfield School, Ampati-o NIOS donganikoba aganangaha.
Ia campaign skul re∙gija dongenggipa bi∙sa sakantikon skulo napate seng·aniko skie ra∙na cholko on∙an baksana saksakoba watchanggija skulo napatnagita miksongani ong∙a. Campaign-ko ong∙atanio katta bichongo pangchake quiz competition-ko ong·atanio ong·e aganchakna man·giparangna boksisrangko on·angaha. Una agreba chrokani aro noksa salsusaanirangko ong∙atanichi ia campaign-ona bang·a manderangko sokchimongataha.
