Don Bosco Higher Secondary School, Tura-o ong∙atenggipa 5 gipa Buccieri Memorial Inter-School Basketball Tournament-ni gnigipa salo mikka waani a∙sel kal∙susaanirangko somoigita a∙bachengna man∙jagenchim ong∙oba mikka namkalani ja·mano susaaniko ong∙atangaha. Ia salo chu∙gimik match ge 4 donggenchimoba somoirang dongjani a·selo match ge 3-kosan kal∙atangaha. Uandake 4-gipa kal∙susaaniko bilsi 14-na batgipa me∙asa dolrang chong·motan Don Bosco Hr. Sec. School, Tura aro Monfort Center, Tura-ni gisepo kal∙aniko somoigita kal∙atna man∙jae da∙al salo kal∙atna tik ka∙angskaaha.
Skanggipa kal∙susaani bilsi 14-ni ning·o ong·gipa me∙chik dolrangni gisepo ong∙angaha jeon Christian Girls Hr. Sec. School, Tura 7-0 point-chi St. Xavier’s Hr. Sec. School, Tura-ko amataha aro gnigipao bilsi 14-na batgipa me∙chik dolrang kal∙angaha jeon Christian Girls Hr. Sec. School, Tura 15-3 point-rangchi Auxillium Secondary School-ko amatskaaha. Gittamgipao bilsi 14-na batgipa me·asa dolrangni kal·anio, Auxillium Secondary School 18-15 point-chi Bosco Mount, Rongkhon-ko amatenba doltangko tournament-o tange rakkina chu∙sokangaha.
