North Garo Hills, Dainadubi jolo ru·uta bilsirangna Government College-ko rikna pangchakani ro·ongko songe galchipe donenganina, ia College-ko ta∙rake rike on·chinagita jolni A∙chik Dedicated Integrity Leaders (ADIL) dolni President Selbistone Momin a·dokni Chief Minister Conrad Sangma-na Memorandam-ko on·angaha. Ia College-ko riknagita 2012 bilsion pangchakani ro·ongko songgenchim ong·oba da∙onaba rika cho∙ani ba maming dingtanggrikaniko nikna man∙kujaenga ine janapangaha. Iani gisepon wilwilao songdongenggipa manderang college-ko riknagita bigha 16 a∙arangkoba pakwatmanaha ineba janapangaha.
Jolo indakgipa college-rang dongjani a∙selo wilwilao songdongenggipa chamdamberang bidana brangna nangao ga∙akenga aro gipin biaprangchi re∙e skie ra∙na chol ong∙pajae senggnang bia ka∙aona soktokenga ine janapataha. Unbaksana Dainadubi wilwila jolo college-rang dongjani a∙sel jolni tang∙doanikoba nikna neng∙enga ineba janapangaha.
Indake ong∙engon, jolni chamdamberangni namgnina aro jolni namroro silroroanina ia pilak neng∙nikanirangko nigrikate Dainadubi-o College nokko ta∙rake rika cho∙anirangko dake kulie on∙chinagita Chief Minister-ko mol∙molangaha.
