Batanggimin 2002 bilsini September 09 tariko South Garo Hills, Chokpot Bulchugre jolo bobil dake chakatgipa ANVC dolrangni ka·saninggija dake DSP, Pa Pechon A. Sangma-ko aro unbaksa gipin sak 5 police-rangko so·ote galani salko gisik ra·e mande ra·aniko dakangaha. Sianggimin bobil dolrangko warachake janggi gimaatgipa sipairangko mande ra·ani somoio Chokpot-ni SDPO K. R. Marak, Chokpot police thanani OC B. R. Marak, Chokpot Unit-ni GSU aro dingtang dingtang gadangni dilgiparang dongpae bakko ra·angangaha.
2002 September jani 9 tarik salo uamang Chokpot police thanaona adita kam nangana re·bae attamchipak Baghmara-ona re·angpilmitingo bobil dolrangni jakchi so·ota man·aha. Ua somoio uamang mamingkoba chanchia dongsojae aro bobil dolni timsoaniko u·ijae Chokpot Bolchugre songon chadrapa man·e an·tangtangni gamchatbegipa janggirangko gimaatna nangaha.
Ia chadrapanio sianggiparangara DSP Pa Pechon A. Sangma (MPS), Pa Padmalachan Sutradhar, Pa Jenur Marak, Pa Sahinson P. Marak, Pa Repingstone L. Kynshi aro Pa Benosik Nongseij ong·a. Uamang sak dok ua somoio bobil dake chakatenggiparangni sinjetaniko champengna sin·a ding·a u·igija manderangko chelchakna kam ka·angaha aro ka·sabegipa nokdang chatchi ma·drangrangko watangna nangaha. Ia sipairangni gimaani Meghalaya a·dokna dal·bea ma·ringani ong·a aro uamang mande ra·ako man·a krachongmota.
