Meghalaya a∙dok bilsi 17-ni ning∙o ong∙gipa me∙asa dolrang Subroto Cup-o mijal salni bako New Delhi songjinmao semi-final-ko Arunachal Pradesh baksa kal∙susaanio Meghalaya 7 -0 goal-chi chegipa ong∙e final-ona sokdoangaha.
Ia kal∙susaanio a∙dokni Banganson Nongphlang gisik nangbee kal∙e gnigipa changna 21, 35 aro 46 minute-rango goal gittamko doltangna chipe on∙aha.
Apsandaken Mebanlamlynti minute 39-o goal sa, Alicestar Thangkhiew minute 44 aro 51-o goal gni aro Mebankhraw bon∙kamgipa goalko minute 65-o chipe chu∙gimik goal 7-ko Meghalaya dolrang man∙aha. Arunachal dolrang ia susaanio jotton ka·e kal∙genchimoba Meghalaya dol uamangna goal-sakoba chipna cholko on∙jaha.
Meghalaya dol bon∙kamgipa ba final-ko Budbar salo Manipur baksa kal∙angskagen.
