Shillong-ni A·chik me·chik saksa Moryca Marak, A·chik jatni ganding chindingko chasong gitalna ma·gape tarigipa, batanggimin September 6 tariko Istanbul, Turkey-o ong·atgipa Northeast India Festival-o Meghalaya a·dokni palo bakko ra·na cholko man·e niksenggipa ong·e jatna mikkim rasongko ra·baaha.
Moryca saksa fashion designer ong·e fashion industry-o chasong gitalni ganding chindingrangko tarigipa ong·a. Ua batanggimin 2016 bilsio Miss North Garo Hills-o skanggipa biapko cheaha aro 2017 bilsioba Miss Glam Northeast-o gittamgipa biapko chebaaha. Unbaksana 2018 bilsio Metropolis Asia-o jaktangchi tarigimin A·chikrangni ganding chindingko mesokbaaha aro 2021 bilsio Northeast International Fashion Week-o Garo ethnic fusion wear-ko mesokbana cholko man·aha.
Ganding chindingrangko tariana agreba Moryca noksa salna, dingtang dingtang ganding chindingrangko tarie mesokna aro gisik a·ning bite gital chanchianirangko ra·bana changgipa sapgipaba ong·a.
