Meghalaya a∙dokni literacy rate 74.3% ong∙enga jean India a∙songni average literacy rate baksa tosusaode aditana apsangrik ong∙enga ine Education Minister Rakkam aganangaha. Mizoram a∙dokni nambata literacy rate-ona chu·sokna man·aniko janape Meghalaya a∙dokni ja∙manchakani a·selni bidingo pangchake sing∙on, Meghalaya a∙dokko 100% ona ra∙dona sorkari je cholchiba jotton ka∙enga ine Sangma aganangaha. Ia percentage-ona sokdona sena-jotna man∙a mangmangsan ong·aija poraiani gadangko ba quality education-ko skanggipa ra·bana nanggen ine Sangma parakangaha.
Minister ong·e aro sorkarinigita, Chief Minister Conrad Sangma-ni dilanichi Meghalaya a·dokko 100% literacy rate-ona ra·dona bim·chipe kam ka·enga. Indake ong·genchimoba, adita a·jarango, Sub-Division aro block-rango skul re·gijagipa bi·sarangko ma·sina nangkuaniko Rakkam parakangaha. Iarangko kolgapatanichisa changsao Meghalaya a·dok 100% literacy rate-ko man·gen ine Sangma aganangaha.
South Garo Hills, poraia skiani a·bao ja·manchakgiparangoni a·ja damsa ong·ani gimin poraiani gadangko tang·doatna ua MLA ong·angkuode letter mark subject mingbrako gong hajal 5-ko bilsirikit on·a ku·rachakaha ine Sangma parakangaha. Ia bilsio Rongara Siju-oni sak 90 chatro chatrirangna ku·chakagita on·mananiko ua janapangaha. Unbaksana, a·doko top 10 gadangona sokdogenchimode a·songni je bakoba admission ka·e on·a ua ku·chakenga ine Sangma parakangaha.
Chatro chatrirangna on·a banoniko tangka paisarangko man·enga ine sing·on, ua an·tangni dormaha ba tangkatangko on·enga ine aganangskaaha.
