Da·al pring 8 bajimangoni a·bachengate Tura Govt. College Students Union (TGCSU), Tura Municipal Board (TMB), FKJGP TGC Cell, NCC aro NSS bakrime college campus-oni William Point-ona rongtal an·talataniko dakangaha. Ia rongtal an·talataniona sak 100-na batpile chatro chatrirang bakko ra·e ku·monganiko mesokangaha.
Uamang college-tangonin a·bachengange joljol William Point-ona kingking jabolrangko rongtalatangaha. Manderangni jabol galchakgipa a·damrangko chong·motan a·a baksa sojronggijagipa plastic aro apsandakgipa jabolrangko uamang rongtalatan baksa so·eba galangaha.
Ia bakrime rongtal an·talataniko dingtangmancha college-tangko rongtale rakkina ku·mongani katta bichongo pangchake ong·atangaha. Sak 100-na batpile chadambe chatro chatrirangni re·bae bakrimanian ia namgipa kamni chu·sokaniko mesoka aro songjinmana namgipa dakmesokaniba ong·a.
