Williamnagar songjinmao songdongenggipa manderangko naljoke rakkinagita Section 115 Motor Vehicle Act, 1988-o pangchake traffic-ni bidingo adita dingtangataniko East Garo Hills-ni Superintendent of Police (SP) Stephen A Rynjah ra·gatangaha.
Ia traffic-ni ra·gatgimin gital niamara, Rongrenggre Govt. Higher Secondary School pekwatgipa ramaoni Soil and Water Conservation office rama pekwatgipaona kingking garirangko ramao rakkie donna man·jawa ine u·iatangaha. Unbaksana auto-rangko Williamnagar Municipal Board office mikkango auto-rangko neng·take rakkina dongipa biapo donchina ge·etangaha. Truck, Dumper aro jrimgipa bosturangko salgipa garirang Williamnagar songjinmani aro Rongrenggre pekwatgipa ramaoni NH-44E-ona re·ruraaniko pringni 7 bajioni attamni 7 bajiona saljachina SP beng·angaha.
