A·dok Sorkari gitalgipa Captain Williamson Sangma State University (CWSSU)-na Vice-Chancellor-ko seokmanaha, indiba Governor-ni namnike ra·chakaniko sengna nangkuenga ine Education Minister Rakkam A. Sangma parakataha. Ia gitalgipa university-ko Garo Hills-o skotong songe university-ni branch-ko Mawlai-o kuliskagen ine Sangma janapangaha. Ia university-o skigipani kamrangna ge 100 post-rangko skotong Campus-na rimnapaniko dakanggen aro ge 6 post-rangko Shillong campus-na on·angskagen, jekon university-ni ning∙o Government Engineering College-ko Mawlai-o kuliangskagen ine Sangma aganangaha.
A·dok sorkari ia university-ko chalaina bilsigimikna korosrangko gong 45 crore mangko tik ka·e donaha. State University-ko chalaianio tangka paisanigita bang·e koros ong·anina ma∙mong sorkari champengataniko dakgenchimoba, a∙doko Common University Entrance Test (CUET) porikkako seanio chu·sokna neng∙anigimin ia university-ko a∙bachengatna cholko man∙angskaaha. Captain Williamson Sangma State University ong∙anigimin iano poraina Central University-ranggita CUET porikkako sena nangjawa ineba Sangma u∙iatangaha.
Captain Williamson Sangma State University-ko a·bachengatnagita University Grants Commission (UGC)-o segatna kamrangko ka∙enga aro UGC-o segatani bakan a∙doko Central University NEHU baksa chapgipa pilak college-rangko ia state university-o bakrimatskagen ineba Sangma u∙iatangaha.
