Sima ari jolo guare kana krongrangko songani ja·mano Rongara Siju-ni te 82 nokdangrang India a·songni a·palo ong·e Bangladesh-chi ga·akangna nangnaba donganina a·dok sorkari Ministry of Home Affairs (MHA)-na janapataha ine Rakkam Sangma u·iatangaha. Ia nokdangrang India aro Bangladesh a·song damgnini biapo ga·akgijagipao songdonggiparang ong·a. Iani bidingo uamangko India a·songona napatpilna MHA-o janapataha aro aganchakaniko sengkuenga ine Sangma parakangaha.
Sima ario guareko zero line-oni mik 150 mang bakroao songani niam donggenchimoba bang·batakon 150-500 metre-ni bijangchio Meghalaya a·dokchipak napate kaahani gimin Bangladesh-chi a·arang napangaha ine Sangma parakangaha. Chief Minister Conrad Sangma-na, iani bidingo u·iataha aro ua ma·mong sorkari baksa golpogrikanggen ineba Sangma aganangaha.
Bangladesh a·songo so·sojengjeng ong·gipani bidingo sing·on, da·o dipet India a·songo maming neng·nikanirang dongkujaenga ine Sangma aganchakaha. Bangladesh baksa India a·song namgipa bakrimaniko on·ronga, indake ong·genchimoba noksulni a·songo so·sojengjeng ong·engkuani gimin bading chiwalanirango neng·nikanirangko chagrongkuenga ine Sangma agandapangaha.
