Meghalaya a∙doko Secondary School Leaving Certificate (SSLC) porikkako 2026-27 bilsioni senakgiparangna chu·gimik subject ge·dokrango pass ka∙na nangtelgen ine Meghalaya Board of School Education (MBoSE) u∙iatangaha.
Ia u∙iatanio 2024-25 aro 2025-26 bilsio senasienggipa chatro chatrirangna ong∙rongbewalgita porikkako ong∙atangkuaigen aro 2026-27 bilsina skang je chatro chatrirang chu∙sokgijagiparangna apsandaken porikka sena man∙angkuaigen ine MBoSE u∙iatangaha. Meghalaya Education Department-ni on∙gimin rai jean August 9 tariko cabinet-nigita 2024-25 bilsini porikkarango dingtangataniko ra∙baaniko rai on∙ani ja∙mansa MBoSE parakataha.
MBoSE bilsio changgni dake porikkako ong∙atgen jean skanggipa porikkako 2025 ni February jao Main porikkako seatgen aro gniggipa porikkako apsan bilsini April ba May jao Supplementary porikkako seatskagen. Skanggipa Main porikkako gital course-ni ning·o ga·akgiparang regular candidate-rangsan donggen aro gitcham course-o ga·akgiparang non-regular candidate-rangba senagita cholko man·gen. Supplementary porikkana main-ni porikkao jegita subject-rango fail ong∙oba porikkako setaina cholko on∙gen ine u∙iatangaha.
Una agreba Supplementary porikkako setaina chang gittamna cholko on·gen jeon Main porikka baksa chu∙gimik changbri ong·gen. Changbri porikka seanio chu·sokjagenchimode gital dake skulo biming segataiesa SSLC porikkako senagita man·skagen. 2025 bilsionide SSLC Main porikkako December-ni skanggipa antio ong·atgen aro Supplementary porikkako 2026 bilsioni March jao bilsiantian ong·atangskana ine tik ka·angaha.
