Batanggimin somoio NGH Nameram VEC-o tangkarangko jakkalsretani bidingo sing∙sandianio report on∙aniko ma∙sisretanina Social Activist Cherian Momin talataniko on∙angaha. Ia jajaaniara North Garo Hills-ni gitcham Deputy Commissioner Kumari Mithali Chandra-ni sing∙sandina raiko on∙ani ja∙mano maming nanggipa ja∙kurangko de∙angjaha ine ma∙sisretani a∙selo ong∙aha ine Momin parakataha.
Iani bidingo Cherian, batanggimin somoio tangka jakkalsretanina gitcham DC-ni sing∙sandina raiko on∙ani ja∙manoba maming ja∙kuko de∙angjaha ine seachi u∙iatangani gimin, da∙o ong∙enggipa DC-ko gital dake am∙sandichina didiataona sokataha. Indake ong·genchimoba, ia ong∙anggipa obostani ja∙pangko name am∙sandianiko dake da∙o ong∙enggipa aro gitcham DC-naba report-ko on∙angmanaha ine MCS officer PTD Sangma talatangskaaha. Iani gisepon, uni on∙gimin report-o pangchake maming ja∙ku de∙aniko u∙irikja ine Chandra aganangskaaha.
Cherian-ni agananigitade, ia ong∙anggipa obostani bidingo gital dake am∙sandichina ADC Leena Sangma-na pakwatangaha ine una u∙iatangaha. Iako aganengon, kakketgipa kattara darang ADC-naba am∙sanditaichina ge∙etani dongja aro una u∙iatgimin koborrangara kakketgijagipasa ong∙ani gimin am∙sandianirango chu∙sokgijani maming kattan nadoja ine Momin parakataha.
Ia a∙sel obostara re∙anggipa November jao Job card donggipa manderangoniko tangka jakkalsreta ine matnanganina VEC-ni President aro Secretary-ni kosako mokordoma ka∙ani ja∙mano ong∙aha ine u∙ina man∙aha. Iani bidingo gitcham DC sing∙sandianiko dakchina ge∙etgenchimoba report-o chu∙gimik obostako name dake u∙ichipna man∙jaha ineba Momin aganangaha.
