Dudhnoi-Baghmara-Dalu National Highway-217 ramako tarichipgija galchipe donenganina East Garo Hills, Nengkra Sub Unit-ni A∙chik Holistic Awakening Movement (AHAM) dolrang Union Minister, Road Transport and Highways, Nitin Gadkari-na chittiko sedoataha.
NH 217 rama dilsa Garo Hills aro Assam-ona re∙rurana mongsonggipa rama ong∙an baksana ia ramako tarigija galchipe donanichi mongsongbate South Garo Hills jolo songdongenggipa manderangna namen neng∙nikanirangko man∙enga ine AHAM dol janapataha. SGH jolo ia ramako tarigija donanichi ramarang namen namjabeani a∙selo gari gorarangko salna saltogijagipa ong∙an baksana wachi kario neng∙nikanirangko man∙enga ineba janapangaha. Apsandaken bading chiwalgiparang, skul re∙giparang, salantio nangana re∙ruraenggiparang namen neng∙nikaniko man∙an baksana jolni tang∙doaniko niknagita man∙jaenga ineba AHAM dolrang u∙iatangaha. Una agreba ia rama Assam, North Garo Hills, East Garo Hills aro South Garo Hills-ko nangrimatgipa rama dilsa ong∙a ineba AHAM dolrang janapangjolaha.
Indake pilak songdongenggipa manderangni neng∙nikanirangko nigrikate nanggipa ja∙kurangko de∙e NH 217 ramako dongimin somoio matchotate on∙chinagita Nengkra Sub-Unit AHAM dolrang Union Minister Nitin Gadkari-na chittiko see mol∙molangaha.
