Ma·mongni Tourism Minister, Gajendra Singh Shekhawat, ru·utbea somoioni dabienggipa Inner Line Permit (ILP)-na ma·mong sorkari on·kange kam ka·enge ine kobor ra·timgiparangna Shillong songjinmao aganangaha. Bang·a a·dokrang ILP-ni bidingo ma·mongona janapeaha aro man·a dipet nambatgipa cholrangko am·sandie ja·ku ga·angna miksonganiko Union Minister Shekhawat aganangaha.
Ia kattarangko ua Shillong songjinmaona Meghalaya a·dokni Tourism summit-ko sokachakaniona re·bae sing·anirangna aganchakangaha. Meghalaya a·doko ILP-ko ra·gatchina ru·utbea bilsirangonin dabienga aro gipin Northeast a·dokrangko toate da·o dipet rakbate dabienggipaba ong·a. Iani gisepon a·doko pilak a·selrangko champengsona Meghalaya Residents Safety and Security Act (MRSSA)-ko sorkari ra·gatna miksongaha jekon da·o bang·bata bakrangon a·bachengatna ja·manchakuenga.
