India a·songo Hockey Legend Major Dhyan Chand-ni atchiani salko pangna bilsian gisik ra·e August 31 tariko National Sports Day ine done manironga. Da·al salo ia salko aro saksa sports-ni a·bao mingsim minggamgipa mandeko gisik ra·nagita West Garo Hills Tura-o 10k Run chong·motan katsusaaniko District Sports Officer ong·atangaha. Ia susaaniona WGH, Tura District Sports Officer, Saljagring M. Marak mongsonggipa ong·e sokbaaha.
Susaaniko chu·gimik km 10-ko katataha jeon bilsi 15-ni ning·o ong·gipa me·a aro me·chik chadamberangna aro bilsi 15-na batgiparangna bak ka·e ong·ataha. Km 10 mang bakroako katna bang·a dingtang dingtang bilsini manderangni ia susaanio bak ra·aniko nikna man·angaha. Katataniko Matchakolgre L.P skul kal·chakramoni pring 6 bajioni a·bachengataha.
Bilsi 15 ni ning·o ong·gipa me·asa chadamberangni gisepo John Omega Ch. Sangma skanggipa, Rhayastone Ch. Marak gnigipa aro Elyen Ernest S. Sangma gittamgipa ong·angaha. Apsandaken, me·chik chadamberangni gisepo skanggipako Akangesa A. Sangma, gnigipako Sneha D. Sangma aro gittamgipako Chukambe G. Momin cheangskaaha.
Bilsi 15-na batgipa me·asarangni katsusaanio, Nirest R. Marak skanggipa, Macmillan D. Marak gnigipa aro Bethnar A. Sangma gittamgipako man·aha. Me·chikrangni gisepo skanggipako Dimchi Ch. Marak, gnigipako Tengsilchi Marak aro gittamgipako Renytha M. Sangma man·angskaaha. Unbaksana consolation prize-rangko pilak category-o sakgittamprakna on·angaha.
Bilsi dal·batgiparangoni Malasing M. Marak aro chonbatgiparangoni Adielo R. Marak, ia 2024 bilsini National Sports Day-o katsusaanio bak ra·giparang ong·a.
