Da·al salo Inter Mahari Football Tournament 2024-o dol 4 maharirang Chandmari kal·chakramo kal·angaha. Skanggipa kal·susaanio Rongmuthu mahari aro Tegite maharini gisepo susagrikangaha.
Tegite maharirang skanggipa half-o Martus T. Sangma goal-ko chipe on·angaha. Apsandaken gnigipa half-ni bakoba Tegite maharina Bonsrang T. Sangma goal 1-ko chipdape on·angaha. Tegite maharirang bimchipe kal·anichi chegipa ong·aha jeon uamang goal 2-chi Rongmuthu mahariko amataha. Rongmuthu maharirang rakbee jotton ka·e kal·genchimoba goal sakoba chipna gita man·rikjaha.
Gnigipa kal·susaanio Chambugong mahari aro Agitok maharini gisepo kal·anio Agitok maharirang chegipa ong·aha Jeon uamang chu·gimik somoio goalsakoba chipgrikna man·jae penalty tinggrikanio Agitok mahari 3-1 goal-chi Chambugong maharirangko amataha.
Unbaksana da·alni kal·susaani bako batanggimin somoio Subroto Cup 2024-o mambee kal·e chu·sokgipa ong·anina Thrisilbirth A. Sangma aro Mark R. Marak-ko rimchaksoaniko dakan baksana mande ra·anikoba dakangjolaha.
Re·baenggipa sombar salo inter maharini susaanio Rangsa mahari aro Cheran maharini me·chik dolrang kal·angskagen.
