GHADC-o kam ka·giparangni jingjengatani gisepo WGH a·jani DC, August 31 tarik Sonibar salo Tura circuit house-o tom·e golpo chanchirimna okamataniko jegale Garoland State Movement Committee (GSMC) dol Chief Minister Conrad K. Sangma-na chitti see parakataha. GSMC, ia kamko Indian constitution-ni article 244 (2)-o dongimin niamko pe·anina, maikai ge·sa a·jani DC Autonomous Council-ni a·sel obostao tom·dilna okamna bil donga ine sing·doangaha.
Meghalaya a·dokni niamo MDC-rang DC-ni tom·dilanio bak ra·na man·ama ineba uamang janapangaha. Tom·aniko dakdilna DC bil man·genchimode, GHADC-ni dormaha man·gijaniko da·ona kingkingba maina Deputy Commissioner niatkujaenga ine GSMC sing·doataha. Ian GHADC-ni tom·tomaniko ru·sina ba gimaatna, Sixth Schedule aro unbaksana article 244 (2)-ni niamko pe·ani ong·a. A·dok sorkari, District Council-ni obostako state subject ine chanmanahaoba dormaha man·gijani kattarang nadobataion nirokatna gisik nangjaha. Sorkari batesa ia obostarangna Autonomous District Council, an·tangtangan Autonomous body ong·e neng·nikanirangko nirokatna uamangon bil aro daito gnang ine agananiko GSMC parakataha.
District Council, Autonomous body ong·ode maina a·dok sorkari District Council Affairs Department (DCAD)-ko bikotaha. A·doko DCAD dongode maina dormaha man·jaenggipani bidingo jrip dongenga aro daitotangko name ka·na man·jaode sorkariko DCAD-ko bon·chongdikatchina GSMC didiataha.
