Tura District Maternity Hospital-o saa dinganio sanna banna jakkalgimin bostu aro samrangko kragija dake galanina A·chik State Peoples’ Front (ASPF) dolrang a∙jani Deputy Commissioner Jagdish Chelani-na chitti see u∙iatangaha.
Sanna bannanio jakkalgimin bostu aro samrangko hospital-ni ki∙sango donggipa bangbanggipa biaprango simsakgija galaniko dakenga ineba ASPF dolrang aganangaha. Indake simsakgija sanna bannanio jakkalgimin bosturangko bangbanggipa biaprango galaniara wilwilao songdongenggipa aro salantio re∙ruraenggipa manderangna sabisirangko altubee ra∙baani ong∙a ineba janapangaha. Unbaksana be∙en nigita an∙seng baljoke dongenggipa manderangni sabisirangoni naljoke dongna ka∙donganikoba gimaataona soka ine janapangha.
Wilwilao songdongenggipa manderangko saa ding∙aoni naljoke rakkina man∙agita Tura District Maternity Hospital-o sanna bannio jakkalgimin bosturangko kragija dake galaniko champengatchina pilak nanggipa ja∙kurangko de∙e ta∙rake nirokatchinagita ASPF dolrang DC-ko mol∙molangaha.
