Chief Minister Conrad Sangma da·al salni assembly session-o Meghalaya Protection of Catchment Area Act 1990-ko name ra·gatna man·jaha ine aganangaha. Act-ni niamon a·a nokgipani on·aniosa bil man·ani gimin uamang jechakode namen neng·nikanirangko chagronga ine Sangma parakangaha. Mikkangchi ia Act-ko nambate ra·gatna man·agita advisory board-ko songaha ineba Sangma aganangaha.
Dingtang dingtang gadangni manderang jekai toromni aro songni nokni dilgiparang, organisation-rang, NGT aro gipinrang re·bae naljokatna nangenggipa biaprangko jako ra·china sorkari didiako man·angaha. Re·anggipa changrangoba sorkari ia biaprangko a·kange ripingna jotton ka·beahaoba a·a nokgipani see on·ako man·jae re·mikkangna man·jaha ine Sangma aganangaha.
Meghalaya a·doko tipangenggipa chiring chibisikrangko department am·sandiaha. Sorkari, ia Act-nigita dal·dalgipa biaprangkosan nirokaigija chonchongipa chiring chibisikrangkoba da·onin u·ie done nirokenganiko Mawsynram, UDP-ni MLA, Ollan Singh Suin-ni sing·anina Conrad Sangma aganchakangaha. Ian dal·a ba chonnao pangchakaigija, ripinganiko aro naljokaniko nanggiparangde pilakan gamchatgipa ong·a ine Sangma agandapangaha.
