Muslim-rangni bia ka·ani aro jikse watgrikaniko British-ni chasongo tik ka·e dongimin niamko bon·atna mijal salni Asaam Assembly-o bill-ko ra·gatangaha. Ia bill-ara Muslim toromnigita bia ka·anio Qazi-rangni jako ra·aniko ra·galani ong·an baksana Assam a·doko donggipa Muslim-rang pilakan bia ka·nagita sorkarini ning·o bimung segatna nangchongmotani niam ong·a.
Ia niamko ra·gataniara a·dokni pilak Muslim me·chikrangna naljokaniko on·an baksana bilsi chu·ongkugijagipa bi·sarangko bia ka·aniko bon·atna miksongani ong·a ine Chief Minister Himanta Biswa Sarma aganangaha.
Ia bill-ni gimin Assembly-o agangolporimaniko dakengon, India a·song gimiko Muslim jat jelbatgipa a·dokrangara Jammu & Kashmir aro Kerala ong·a jeon ia niamrangko ra·gatmanaha ine Sarma aganangaha. Kerala-o ia niamko ra·gatgipa Congress aro dingtang dingtang party-rangchi sorkariko chalaigiparang ong·naba gnang maina salgipengchipakde BJP da·onaba bilo dongkuja ineba Sarma agandapangaha.
