National Crime Records Bureau (NCRB)-ni gitalgipa report, “Student suicides: An epidemic sweeping India” katta bichongko done sandigipao India a·songo poraienggipa chatro chatrirangni an·tangko so·ote siani batrikrikenganiko parakataha. Ia report-ko Annual IC3 Conference & Expo 2024-ko ong·atanio mesoke on·angaha jeon chatro chatrirangni an·tangtangko so·ote siani ia batanggimin bilsi 20-ni gisepo bilsiprako 4 precent-ona tang·doaniko u·iataha.
2021 bilsio, India a·songo poraienggipa chatro chatrirang sak hajal 13,089 mang chatro chatrirang chu·gimik so·ote siangaha. Ian re·anggipa bilsiona bate 4.5 percent-ona tang·dodapaha jeon chatrorang 57 percent-nigita ong·a. Report-o janapanigitade poraienggipa chatro chatrirangan game ge·e chagiparangni an·tangko so·ote siana bateba bangbataha ine u·iataha. Iasan ong·aigija, population growth aro a·song gimiko so·ote sigiparangkoba batangaha ine ma·sina man·aha.
Maharashtra a·doko an·tangko so·ote sigiparang sak hajal 1,834 ong·e, ian a·song gimiko so·ote sigipa a·sel ong·aoni bang·batsranggipa ong·aha. Unbaksana gipin a·dokrang jekai Madhya Pradesh (1,308), Tamil Nadu(1,246, Karnataka (855) aro Odisha (834) sokdoaha. Uttar Pradesh a·songo dal·batsranggipa a·dok ong·genchimoba poraienggipa chatro chatrirangni an·tangko so·ote sianirangde komiskaenga ineba parakataha.
