Batanggimin sal somoirango Meghalaya Civil Service (MCS) preliminary porikkako segiparangni result-ko parakatanio mikkang nitee kamrangko ka∙angaha ine nike Khasi Students’ Union (KSU) dolrang jingjengataniko dakangaha. Iani bidingo da∙al salni Assembly session-o VPP-ni dilgipa aro Nongkrem-ni MLA Ardent Miller Basaiawmoit Chief Minister-ko sing∙doangaha.
KSU-ni matnanganina aro Shillong Times janera-o Meghalaya Public Service Commission (MPSC)-ni Secretary-ni de∙mechikni kosako kakketgijagipa kattarangko segatanina Chief Minister Conrad Sangma aganchakaniko dakangaha. Iani bidingo talatengon, MPSC-nigita talataniko Assembly-o Chief Minister parakangaha. Indake MPSC-ni Secretary-ni de∙mechik jekon A. Marak ine janapgimin mandeni kosako adita matnanganiko aganengon, uko MCS preliminary porikkani skanggipa list-o aro gnigipa list jeon sak 62 candidate-rangni pass ong∙aniko parakatanioba maming dakeba porikkako pass ka∙e chu∙sokgipaba ong∙ja ine Chief Minister talatangskaaha.
Chu∙sokgipa candidate-rangko gnigipa list-o MPSC-ni parakataniara, porikkao chu∙sokgijagipa saksa candidate-ni minggittam sing∙anirango ong∙gija gatatanina aro uni man∙gimin mark-rangko u∙ina changni chang sing∙doani a∙selsa nipiltaina nangao ga∙akaha ine Sangma talatangaha. Ia minggittam sing∙anirango kakketgija ong∙aniko nike pilak porikka segiparangni man∙a nanggni mark-rangko nipiltaiesa gnigipa list-o sak 62 candidaterang chu∙sokgipa ong∙aha ineba Chief Minister talatdapangaha.
Iako aganengon, name tale dake MPSC baksa sing∙sandichenggija indake songbadrango skatang koborrangko chapa ka∙aniara porikka segipa chadamberangna jajaataniko ra∙baasan ong∙aigija MPSC-ni bimingkoba nosto ka∙ani ong∙a ine Chief Minister janapangaha. Ia ong∙anggimin obostarangko name dake nipiltaina aro mikkangchi MPSC ko namdapatna dingtang dingtang ja∙kurangko de∙angenga ineba CM parakataha.
Re∙anggipa somoio KSU-ni jingjengataniko man∙e MPSC knachakna nangaona ga∙ake mark-rangko August 9 tariko parakangaha. Unbaksana MCS preliminary porikkani minggittam sing∙anirango ong∙gija gatataninaba MPSC-ni Website-o talataniko on∙angaha.
