Batanggimin sal somoirango Assam-ni Chief Minister Himanta Biswa Sarma aro USTM-ni gisepo adita matnanggrikanirangko nikangna man∙aha. Iani gisepon Assam sorkari USTM ni Chancellor Mahbubul Hoque-ni kosako kragipa ja∙ku de∙anirangko dakanggen ine koborna parakataha.
USTM-ni Chancellor kakketgijagipa Other Backward Class (OBC) certificate-ko jakkalenga ine matnange uni kosako mokordomako ka∙angna miksonganiko Karimganj a∙jani District Commissioner Mridul Yadav janapangaha. Yadav-ni agananigitade Hoque-na ia certificate-ko 1992 bilsini August 24 tariko on∙angaha jekon 1996 bilsini August 20 tariko changalangaha ineba u∙iatangaha.
Caste certificate-ko niamni a∙palo ra∙aniara dosi dakani ong∙a ine Assam-ni Chief Minister Himanta Biswa Sarma, Budbar salo kobor ra∙timgiparangna aganangan baksana District Commissioner-ko USTM Chancellor Hoque-ni kosako kragipa sastiko on∙chinaba ge∙etangaha. Saksa skigipa ong∙e kakketgijagipa OBC certificate-ko jakkalaniara kraa ong∙ja maina Karimganj-ni gitcham DC-an uni tol∙pinike certificate man∙aniko rima man∙e ra∙galaha ine Sarma agandapangaha.
