Re·anggipa 2024 MP election-ni campaign-o, Education Minister Rakkam Sangma VPP dolrangni kosako Khasi aro Garorangko ding·grikatna kam ka·enga ine agangipa video-o nakatgipa kattarangni bidingo VPP-ni dilgipa Ardent Miller Basaiawmoit da·alo Assembly-o janapangaha. Ua jatsa jatgipinko kajia gondogolona ra·bana am·gipa gisik donggenchimode 1980 bilsirangoni Garorang baksa meli nangrime kam ka·na ja·ku de·jawachim ine aganangaha.
Iani bidingo VPP dolrang Rakkam Sangma-ni kosako mokordoma ka·anikoba Basaiawmoit janapangaha. Rakkam Sangma-ni agangipa kattarangna sorkariko mikkang nitee naljokatjachina ba champengjachinaba Basaiawmoit didiangaha.
Basaiawmoit, iani bidingo Deputy Chief Minister aro Conrad Sangma-ko aganchakchina dabianiko dakangaha. Indake ong·genchimoba Deputy CM Prestone Tynsong, ia ong·a obostako assembly-o maming dakeba aganani ong·ja ine aganchakanina Nongkrem-ni MLA Ardent Miller Basaiawmoit aro uni dolni gipin MLA-rang Rakkam Sangma-ni aganchakaniko nangnikjae assembly-oni ong·kate katskaaha. Rakkam Sangma, iani gisepon poraia skia donggipa manderangde maming saloba jegrikrongja ine aganangskaaha.
