North Garo Hills, Bajengdoba-oni Borjhora-ona re·na jakkalenggipa rama namjabeahanina ta·rake taridape on·china songdongenggipa manderangni palo A·chik State People’s Front (ASPF) H.Q Tura dolrang CM Conrad Sangma-na chitti see mol·molataha. Ia rama namjabee a·kilokrara dakanichi jolni manderangni minute 40-o sokna nanggipako konta 2 mang re·na nangengaha ine janapataha.
Uamangni agananigitade, ia rama Bajengdoba jolo songdongenggiparangna salantio bading chiwale cha·na jakkalenggipa ong·an baksana janggitanganio dingtang dingtang kamrangna jakkalenggipa dilsa nangchongmotgipa ramaba ong·a ine ASPF dolrang janapataha. Unbaksana ian NPP-ni MLA-ni constituency-ba ong·a ine janapataha.
Una agreba ia rama Garo Hills-ni manderangna namen nangchongmotgipa rama ong·a maina ia rama NH-51 Bajengdoba-oni Rongsai AMPT ramaona Assam Meghalaya sima arini Borjhora aro Rongsai-ko napake re·gipa ong·a. Indake ong·engon ia ramako ta·rake taridape on·anichi bading chiwalaniosan ong·aigija jolna chu·gimik tang·doaniko ra·baani ong·gen ine chittio janape ASPF dolrang CM-ko mol·molangaha.
