Gambegre bye election-o TMC party-oni susana gitcham Minister aro Rangsakonani MLA ong·anggipa Zenith Sangma-ni jikgipa Sadhiarani Sangma-ko jinmaan namnike tik ka·angaha.
Dr. Mukul Sangma, kobor ra·timgiparangna talatengon iani bidingo chairman-ni bon·kame ra·chakaniko sengkuna nanggen ine parakangaha. TMC party Gambegre-o chegipa ong·na raken krenge kam ka·enga ineba ua agandapangaha.
Sadhiarani Sangma, batanggimin changoba Gambegre constituency-o changgnina susaaha jeon ua bang·gija vote-rangchisa sirikaha. 2023 assembly election-oba ua gnigipa ong·angaha jeon Saleng Sangma hajal 11,178 vote-rangko man·aha aro Sadhiarani king hajal 8,345 vote-ko man·skaaha. Ian da·o uni gittamgipa changna susaani ong·enga jeon ua Chief Minister-ni jikgipa Mehtab Chandee aro gipin candidate-rang baksa susana nanggen. Congress dolrang uamangoni susanasienggipako da·o dipet bimungrangko parakatkujagenchimoba, Jingjang Marak-ko susaatna ka·dongsoenga ine u·ina man·angaha.
