Williamnagar Jawaharlal Navodaya Vidyalaya (JNV) skulo poraienggipa chatrorangni kosako sinjetanirangko on·enganina nirokatna nanganiko A·chik Progressive Approach (APA) dolrang koborna parakataha.
Uamangni u·iatanigitade, JNV skulo poraienggipa chatrorang mongsongbate skulo gital napgiparangni kosako senior-rang kragija kamrangko ka·e sinjetanirangko on·ani a·selo class-rango napgija dongenga aro boarding-o dongna kenenga ine parakataha. Unbaksana senior-rang gital napgipa chatrorangni kosako kragijagipa kamrangko ka·enga chong·motan skulni a·palchiko pekatgipa bosturangko ra·na watanirang ba ka·mikkenatanirangko dakenga ineba janapataha.
Iani gisepon skigiparangba ia kamrangni bidingo chu·gimik daito ra·gija donenga aro campus ning·o counsellor dongjani a·selo indakgipa obostarangona sokatenga ine APA dolrang janapataha. Una agreba chel·aoni re·bae detangtangko skul watenggipa ma·a paarang uamangni bi·sarangni chu·gimik namgniko nirokna skulni skigiparangon ka·dongengani gisepon skul bi·sarangni bosturang gimaenganikoba knasonagita man·rongenga ineba janapangaha.
Indakgipa obostarangko chagrongenganina, poraienggipa bi·sarangni chu·gimik namgnina aro namgija kamrangoni naljoke rakkina man·agita daito donggiparangko nanggipa ja·kurangko de·e nirokatchina APA dolrang mol·molataha.
