Assam-ni Chief Minister Himanta Biswa Sarma, University of Science and Technology Meghalaya (USTM) baksa adita nanggrikanirang dongani a∙selo, USTM-o poraie matchotgipa chatro chatrirang Assam a∙doko kamrangna dorgastoko galna man∙jawa ine aganangaha.
Sarma-ni indake beng·aniko dakataniara, USTM-o gital medical college-ko kulinasiengani gimin ian Guwahati Medical College and Hospital (GMCH)-ko ra·ona miksongani ong·enga aro USTM-o gital kulinasienggipa medical college-ko National Medical Council-oni nirok sandina re·baani somoio sagijagipa manderangko tol·mike mesokataha ineba Sarma matnangataha. Ia pilak obostarangko nigrike niam retiko nirokgipa department, kragipa niamrango pangchake cholrangko am·e USTM-oni pass ka·gipa chatro chatrirangna sorkarini kamrangko ong∙jachina ge∙etangaha maina Meghalaya gipin a∙dok ga∙akani gimin USTM-ni certificate on∙gipako kakketgipa sakki ong∙e nikja ine Sarma agandapangaha.
Unbaksana Assam a∙doko songdonggiparangko Meghalaya a∙dokni USTM-o tangka bon∙e poraiani palo a∙doktango tangka paisa nanggijagipa university ba college-rango poraichina didiangaha. Iani gisepon Sarma-ni indakgipa kamko ka·na ja·ku de·anina bang·a manderangan niamko pe∙ani aro mikkang nie baseani ong∙jama ine sing∙doangaha aro ian Sarma-ni USTM baksa nanggrikani gisepon indakgipa kattarangchi bate ding·chaoaniona sokataha.
