Batanggimin somoio Assam-oni mandeko jekon Tura-oniko rim·srukanio jak donggipa manderangko Meghalaya pulis dolrangni August 18 tariko Dudhnoi-o rim·na jotton ka·anio jokanggiparangko, NGH pulis dolrang mande saksako rim·na man·aha. Pulis dolrangni u·iatanigitade, rim·ako man·gipa Ramu Ch. Marak-ko Kharkutta Police Station-ni ning·o ong·gipa biaponiko rim·aha jekon da·o pulis dolni jako donenga ine parakataha.
Marak saksa Meghalaya-ni mande ong·a jean Assam-oniko jik kimaha. Ua bang·a namgijagipa manderang baksa aro ia rim·srukanio bak donggipa ong·a. Unbaksana uamangni dolko saksa bolbil dake chakatgipa dolni gitcham mande dilenga aro uamang dolni gipinrang kate chakuenga ineba janapangaha.
Pulis dolni August 18 tariko Dudhnoi-o chadrapanio, uamangoni sakgniko saknaatna man·aha jeon Marak-ko ja·o guli nangaha ine u·iatangaha. Indake ja·o guli nange saknaa man·genchimoba Marak jenten electric auto-o gakate uamangni dongnuchakram biapona kate jokangaha. Iani gisepon bon·kame uko salsagipaon chong·motan August 19 tariko rim·na man·aha ine parakataha.
Uamangni dol pulisrangni chadrapanio kate jokangna man·genchimoba a·sel ong·chakram biaponiko uamangni mobile phone aro scooty bolsako man·e namgijagipa kamrangko ka·na miksonggipaoniko naljokatna man·aha ineba parakangaha.
