Sombar salo, NPP dolona bakrimegipa sakgittam Congress MLA-rangko party-ni National President aro a·dokni skotong Minister Conrad Sangma rimchaksoan baksana da·o dipet cabinet-o maming dingtangatani dongjawa ine parakangaha. Sangma, gital member-rangni bakrimanina uni kusi on·aniko parakatengon, ian uamangni party-o kakket bebe ra·aniko mesoka ine aganangaha.
NPP party-o sak 28 MLA-rangoni, chu·gimik 60 seat-oni da·o sak 31-ona baridapaha. Apsandake, Congress MLA-rang sakgittam ong·katanichi da·o uamango saksa MP aro MLA-san ong·skaaha.
Batanggimin salrango iamang sakgittam MLA-rang Congress-oni ong·kate NPP baksa bakrimna am·anirangko knasoe, MDA sorkario cabinet-o biap on·a am·enganiko jangbingbangsoaha. Iarangna aganchakengon, da·o dipet cabinet-ko a·bachengaoni chalaibaengagitan kamrangko dingtangatgija apsandaken ka·angkuaigen ine Sangma parakangskaaha.
Iani gisepon Nongstoin-ni MLA Gabriel Wahlang, Mawhati-ni MLA Charles Marngar aro Umsning MLA Dr. Celestine Lyngdoh, constituency tangni tang·doanina aro namroro silroroaninasa NPP baksa bakrimaha ine kobor ra·timgiparangna parakangaha.
A·doko NPP dolo bang·bate MLA-rang dong·engon, MDA sorkario bakrimgipa gipin party-rang jekai UDP-ni sak 12, HSPDP-ni 2, BJP-ni 2 aro Independent-ni sak 2 MLA-rangko ra·galani bidingoba sing·anirang ong·katenga. Una agreba sakgittam MLA-rangni napanichi MDA sorkario da·o sak 47-ona sokdoangskaaha.
