East Garo Hills-ni Rongjeng Model Degree College-ko Chief Minister Conrad K. Sangma, Education Minister Rakkam Sangma, Rongjeng-ni MLA Jim Sangma aro gipin dilgiparangni dongpaanio da·al salo nokdonggae on·angaha.
Ia college-ko RUSA 2.0 nigita gong crore 12 tangka paisarangko chamate rika cho·anirangko matchotataha jean chadamberangna poraia skianio nambata cholrangko ra·bana dakchakanggen ine Chief Minister aganangaha. Chief Minister, ia college-ko matchotatna dakchakanina ma·mongni Education Minister, Darmendra Pradhan-koba mittelangaha. Ia college donganichi chu·a gadango poraianiko silroro namroroatna cholko on·gen ineba Sangma aganangaha.
Skanggipa batch-ni chatro chatrirangna ia bilsionin admission-rangko on·e uamangna bidako on·a a·bachengatenga. Ian, dingtang mancha jolni wilwilao donggipa chadamberangna bida pakwatramrang dongjani a·selo brangna nanganiko adita chel·atna dakchakaniba ong·gen.
