Da·al salo West Garo Hills a·jani Tura, CCS conference hall-o handloom, handicraft, bakery aro confectionery-ko sal 15 na skie ra·na cholko on·agita course-rangko oprake on·angaha. Ia a·barango skie ra·aniko Raising and Acceleration MSME Performance (RAMP) scheme-ni ning·o August 19-oni September 2 tarikona sal 15-na ong·atanggen.
Ian, Tura-ni Department of Textiles and Apparel Designing, CCS, CAU (I) aro Department of Food Science and Nutrition CCS, CAU (I), Meghalaya sorkarini Department of Commerce & Industries-ni dakchakanichi apsan nangrime ong·atenggipa ong·a.
Da·alni program-o CAU, Imphal ni Vice Chancellor Dr. Anupam Mishra mongsonggipa sokgipa ong·e re·baaha. Unbaksa, Tura, DCIC ni General Manager Don Felicient R. Marak aro Tura, CCS, CAU (I) ni Dean Dr. Jyoti V. Vastrad, uamangba bakko ra·angaha. Program-o skanggipa, sokbagiparangko mande ra·aniko dake a·bachengaha, jeni ja·mano uamang candle-ko so·enba tom·bimonganiko oprake on·angaha.
Apsan daken, iano bang·a adita chatro chatrirang, gital aro gitcham entrepreneur ba pale sim·e cha·giparang, skigiparang aro Garo Hills-ni a·ja ge 5-ni dingtang dingtang department-ni dilgiparangba sokbatokaha.
RAMP scheme Central Sector Scheme ong·a jekon 2022 bilsio Ministry of Micro Small and Medium Enterprises (MoMSME) World Bank-ni dakchakanichi MSMEs-ni kam ka·anirangko nambatatna a·bachenge on·angaha. RAMP scheme re·baenggipa 2027 bilsiona kingking dongangkugen.
