International gadangona sokanggipa film Director Dominic M. Sangma-ni ‘Rapture’ ba ‘Rimdogittanga’ jawilwatko Tura District Auditorium-o mesokani skanggipa salo jean a∙songo jakgitel ong∙ani salko maniengon bang·a manderangni re∙bae nianiko nikangna man∙aha. Ia skanggipa salo, dal·dalgipa manderang, ma·gipa pagiparang, chadamberang aro jawilwato dakmesokgipa bang·a kal·giparangan sokbatokaha. Tura songjinmao songdonggiparangsan ong·aigija Garo Hills-ni gipin bakrangoniba re·bae nina cholko ra·tokaha.
Ia jawilwatko skanggipa 11:30 bajio mesokna a·bachengaha jeon manderang dri dri dake chadenge nina sengtokaniko nikangaha. Gnigipako 2:30 bajio mesokangaha aro gittamgipako 5:30 bajio mesokangskaaha. Mijal attamni 5:30 somoio mesokgipa ticket-rangko bon·e palnangaha jeon auditorium-ni chu·gimik asongchakani biapo 580 seat-mango niangtokaha. Ia jawilwatko nina a·jani Deputy Commissioner Jagdish Chelani, SP Abraham Sangma, Retired MCS officer-rang, Professor-rang aro gipin niksenggipa manderangba re·batokaha.
Re·anggipa salrangoba ia jawilwatko France a·songni dam 150 theatre-rango mesokangaha. Ia jawilwat hajalni hajal jawilwatrang baksa susae seokako man·e chu·a gadangona sokangaha aro da·o dipet adita award-rangkoba man·angaha. Ian A∙chikrangni gisepo skanggipa international-ni gadango chu·sokanggipa ong·a, jean Garo Hills-o mesokanioba skanggipa salon dal·bea chu·sokaniko nikna man·aha.
Ia jawilwatko Director Dominic Sangma ni dakdilanio chu∙sokatna man∙genchimoba Tura songjinmani saksa sapgipa Eva Gunme Marak-ni producer ni kamko ka∙e indakgipa gadangona sokatna man∙aha aro Garo Hills ni manderangna name dake mesokanikoba dakangna man∙enga. Ia skanggipa salo adita nina re∙bagipa manderang uamangni gisiktango chanchichipe donganirangkoba Director Dominic Sangma aro jawilwato kal∙gipa manderang baksa golporimange sing∙anirangkoba dakangaha.
Indake A∙chik a∙songo bang∙a manderangni ia jawilwatko nina re∙baaniko nike Eva Gunme Marak aro Dominic Sangma uamangni mittelpilskaani kattarangkoba aganangaha. Manderangna ia jawilwatko mesokangna dingtang mancha Department of Art and Culture, Directorate of Information and Public Relations (DIPR) aro gipin departmentrangba bakrime kamrangko ka∙angtokaha.
Rapture jawilwat India a∙songo aro gipin a∙songrangchiba namen niksenganiko man∙enga jekon Tura songjinmao mesokangna cholko man∙aniba mingsa chu∙sokaniko mesokangaha. Ia jawilwatchi dingtang mancha A∙chikrangni dakmesokaniko aro changa sapaniko agilsak gimikna mesokangna cholkoba on∙angaha jean Meghalaya a∙dokna namen rasong chabeani katta ong∙chongmota.
