A·dokni medical college-rangko ru·utgija somoini gisepon a·bachengatna miksonganiko Chief Minister Conrad Sangma parakangaha. Shillong songjinmao donggipa medical college-ko re·baenggipa bilsi 2025-o aro Tura-niko 2026 bilsio a·bachengatna am·enganian sorkarini dal·a miksongani ong·a ine Sangma aganangaha. Ia kamrangko chu·sokatna jinmani bakrimaniko nangnike apsan ku·mongnaba mol·molangjolaha.
Ia kattarangko ua Shillong songjinmani Ganesh Das hospital-o a·doko sorkarini sanchakramrangoni skanggipa Babies’ Critical Care Unit-ko oprake on·ani somoio aganangaha.
Medical college-rangko a·bachengatna, ICU, OT aro gipin a·barangko National Medical Commission (NMC)-ni nangnikagita chu·onge dongsona korosrangko on·dapna nangkuenganikoba Sangma janapangaha. Pilak nang·dapenggipa kamrangko ka·na tarisamsoani dongaha aro sorkari ia kamko chu·sokatna re·mikkanggen ine Sangma agandapangaha.
Meghalaya a·dok re·baenggipa bilsi 2 ni gisepo ge·gni medical college-rangko a·bachengatanian sanna bannani a·bako namdapatna ka·dongsoenga ine Sangma janapangaha.
