East Garo Hills ni Mangsang songo Nongbak Apal Sub-Centre ko nirok simsakgija dona ni a·sel centre-o kam ka·giparang bang∙a neng·nikaniko man·enganina Niksamso Garo Community Organization ta∙raken nirokatpachina daito donggiparangko mol∙molangaha.
Ia sub-centre ni obosta namen namjabeahani gimin mikkangchi be·gruna nangaona sokaniko champengsona nanganiko janapangaha. Indake nirok simsakgija donaniara kam ka·enggipa nurse rang aro sanna banna re·bagipa manderangna namen kenbegnigipa ong·enga ine u∙iatangaha. Ia songosan ong∙aigija indakgipa obostarangko Garo Hills ni bang∙a songrangni sub-centre rangoba apsan obostakon chagrongtokenga. District ni skotong DMHO ni nirok simsakna daito ong∙genchimoba bang∙a changon galchipe donaniko nikna man∙enga ineba uamang janapataha.
Sub-centre-o sanna bannaniko dakna re·bagiparang dongengon, mongsongbate emergency-ni somoirango bi∙sa an∙pakna sokbagiparangna maibakai ua somoio nok be·gruna nanggenchimode sawa mancha daito ko ra∙gen ineba NGCO ni dilgiparang sing∙doangaha. Indakgipa a·selrangoni naljoke rakkina man∙agita sub-centre rangko ta·rake nirokatpachina didiangaha.
