All Meghalaya SSA Non-Teaching Staff Association (AMSSANTSA)-rangni dormaharangko 80 percent-ona bariatchina dabianiko nirokatna sorkarini songgipa Rationalisation Committee da·al salo tom·e chanchirimna tik ka·angaha. A·dok sorkari ia committee-o sak 20 manderangko seokaha jekon Commissioner aro Secretary, Vijay Kumar Mantri dilanggen.
Batanggimin salrangoba Non-Teaching Staff Association-ni dilgiparang Mantri aro uni committee baksa golporimangaha. Iasan ong·aigija Cabinet Minister, Ampareen Lyngdoh, Shillong Madan Malki-o jingjengatenggipa association-ni manderangko gronge Education Minister Rakkam Sangma baksa agangolporimna parakangaha.
Sak 1200-na baten SSA non-teaching staff-ni manderang ia jingjengatanio bakko ra·enga jekon sorkarini 25 percent-ona ra·doatna tik ka·giminko ra·chakgija 80 percent-na kim·kime dabiangkuenga. Da·al salo Commissioner aro Secretary, Vijay Kumar Mantri baksa golporimnasiengon uamangni dabianiko man·a ka·dongsoaniko parakangaha aro indake ong·jaode chotchanggija dabiangkuna association-ni dilgiparang aganangaha.
