South West Garo Hills Rangsakona Deficit Secondary School-o kamna rimnapna interview ra·ani result-ko parakatanirango tik ong·janina aro skulni ning·o chu ringanirangko dakenganina South Western Zone A·chik Holistic Awakening Movement (AHAM) dolrang ia ong∙enggipa obostarangko name am·sandianiko dake kragipa sastiko on·china didiangaha. Iani bidingo SWGH-ni DC-na aro DSEO-na re·anggipa jao chitti see u·iatangahaoba maming nirok simsakatani ja·kurangko de·anirang dongkuja ine AHAM dolrang parakataha.
Songni manderangni aro School Management Committee (SMC)-rangni agananigitade kamna rimnapanio tik ong·jan baksana skulni Secretary aro President-ni advertisement-o janapagita ong·gija niamni a·palo kamko ka·enga ine u·iatangaha. Unbaksana advertisement-o jolni manderangko rimnapgen ine janapani kosakon joloniko rakkigija gipinrangkosa seokaha ine janapataha.
Indakgipa kamrangkosan ka·aigija skulni Secretary, President, Headmaster aro DSEO ni palo sokbagiparang interview matchotani ja·mano chu ringaha ineba janapangaha. Indake skulo churangko ringaniara songdongenggipa manderangna songsalna kragijagipa kam ong·an baksana skulni niamrangko pe·ani ong·a ine suk ong·janiko parakataha. Una agreba ia obostarangni bidingo SMC-rangni badi ka·anirangko dakgenchimoba uamangni kosako drae kamna rimnapaha jekon advertisement-na skangan mandeko tik ka·aha ine u·ina man·aha.
Ian kamna rimnapanio dongimin niamrangko pe·ani ong·a aro iani bidingo am·sandianirangko dake nanggipa ja·kurangko de·e kragipa sastiko on·china AHAM dolrang mol·molangaha.
