Gambegre Constituency-ni by-election ong·nasienggipao susaana gita Chief Minister-ni jikgipa Mehtab Chandee Sangma-ko NPP candidate ong·e seokaniko Gambegre-o party-ni tom·anio NPP-ni National President aro Chief Minister Conrad Sangma parakataha. Gambegre Constituency-o Congress-ni MLA Saleng A Sangma Tura-ni MP ong·ani ja·mano bangbang ong·e dongenggipa biapko gapatna bang·a party rang candidate ko seokange susaangtokgen.
Election Commission-ni gita pu·onani tariko ta·raken jinmana parakataniko dakanggen, maina by-election ong·ataniko ia bilsini ja 6 ni gisepon ong·atanggen ine aganangaha.
Re·anggipa June 27 tariko NPP-ni election committee Gambegre by-election o susaana sak 4 candidate rangko basee don·aniko dakanganio party-nigita Mehtab Chandee Sangma-na ticket-ko on·a tik ka·angaha.
Congress dolni Gambegre by-election-o susaaniko dakna Jingjang A Sangma-ko candidate-na seokangaha. Trinamool Congress dolrang Zenith Sangma-ni jikgipa Sadhiarani M Sangma-ko seokangaha. Sadhiarani jean Dengnakpara Constituency-ni MDC ong·enggipa batanggimin electionrangoba changgni-na kingking Gambegre constituency-o Saleng Sangma baksa susaanio 2,871 vote rangchi sirikna nangao ga·akaha.State BJP-ni Vice President aro Tura-ni MDC Bernard N Marak-ba party-ni seokaniko dakgenchimode Gambegre by-election-o susana miksonganiko talatangaha.
Gambegre seat-na susaaniko dakanio rakbegipa dakgrikani Congress dolna ong·enga jeon Trinamool Congress party mikkangchakgipa dol ong·enga. Congress dolrang a·doko ge 4 seat rang aro TMC dol ge 5 seat rango MLA rang gnang. BJP dol-ni gita da·o dipet Garo Hills-ni constituency rango Assembly election nigita ge·sa seat-o mangba MLA dongkujaenga.
