Meghalaya Junior & Sub-Junior State Boxing Championship 2024-ko Meghalaya-ni skotong Shillong songjinmao August 7 oni 9 tarikona ong·atanggipao a·dokni dingtang dingtang a·jarangni boxing kal·gipa chadamberang bakko ra·angaha. Ia State Boxing Championship-ko Meghalaya Boxing Association (MBA), Directorate of Sports & Youth Affairs baksa bakrime ong·atangaha.
Garo Hills-ni palo ia susaanio West Garo Hills, East Garo Hills aro North Garo Hills-ni chadamberang bakko ra·angaha jeon WGH dolni susagiparang gnigipa biapo chegipa ong·e adita medalrangko man·baaha. WGH dolko ia susaaniona Meghalaya-ni National Boxer aro Garo Hills Boxing Association-ni Balnas Sangma (Secretary), Angam Marak (Manager) aro Matthew Marak (Coach) ong·e dilangaha.
Susaanggiparangoni kg 50-52 ong·gipa category-o Chegado Kurangsal D. Momin gold medal-ko man·aha, Dimsrang Ch. Momin (52-54kg) category-o bronze medal-ko man·aha aro Casbe K. Marak (63-66 kg) category-o gold medal-ko man·baaha.
Apsandaken Sub-Junior dolo susagiparangoni Nambearo M. Sangma (33-35 kg) category-o gold medal-ko cheaha, Challang D. Areng (52-55 kg) category-o gold medal-ko man·aha aro Marbaniang M. Sangma (31-33 kg) category-o bronze medal-ko man·skaaha.
Ia chadamberangni chu·sokaniara A·chik a·songna mikkim rasongko ra·baanisan ong·aigija chadambe sakantikon dingtang dingtang susaani a·bao chu·sokna aro chuangna man·aniko dakmesokani ong·a.
