Shillong songjinmao Khasi Students’ Union (KSU) dolrangni chotchanggija sinjetaniko man·e Meghalaya Public Service Commission (MPSC), Meghalaya Civil Service (MCS) porikka segipa chadamberangni mark-rangko konta 24-ni gisepo mesokna ra·chakangaha. MPSC-ni Chairman, PR Marwein-ko KSU dilgiparangni grongani ja·mano kakket ong·gijagipa aro kakketgipa prelims-ni answer key-rangko, unbaksana minggitam ong·gijagipa sing·ani aro answer-rang baksa mesokatna ra·chakangaha ine KSU-ni President Lambokstarwell Marngar aganangaha.
A·doko ong·atanggipa MCS prelims porikkao chu·sokgiparangni kosako dongimin niamrangko jakkalgija seokanina manderangni gisepo adita kusi ong·gijani aro namnikgijanirang ong·kataha. Indake ong·engon bang·a NGO dolrang aro porikka segiparang MPSC-ko kakketgipa mark-rangko mesokchina aro parake kamrangko ka·china dabianirangko dakangaha. Ia kamrango an·tangtangni manderangko seokahanina aro mikkang niteani gnang dakahanina matnange MPSC-ni kosako raken sinjetaniko dakangaha.
2019 bilsio advertisement nakatgipao pangchake interview-ko kraa bewalo ong·atchina chong·motan gital office memorandum-o ra·gatgimin 1:1.5 ratio-ko ja·rikgija 1:2.5 ratio-ko ja·rikchina KSU dolrang dabiangaha. Uamang MPSC-ni adita kam ka·giparangni noksarangkoba tarie so·angaha aro dabiagita dakchina ku·rang on·angaha.
Iani gisepon, Cabinet Minister, Paul Lyngdoh, skanggipa MPSC-oniko report-rangko ra·e Chief Minister Conrad Sangma-na mesokangna miksonganiko parakangaha. Ia report-rangko nie Cabinet baksa chanchirimna nangani aro nanggija gimin ja·ku de·anggen in Lyngdoh aganangaha.
