A·dokni Deputy Chief Minister aro Home department-ko jako ra·enggipa Prestone Tynsong, Bangladesh aro India a·songni sima ari jolrango da·o dipet maming so·sojengjeng ong·ani ba a·sel golmaalrang dongkujaenga ine aganangaha. Sima ariko chel·chakenggipa BSF dolrang Meghalaya a·dokona Bangladesh-oni napsrukbana jotton ka·aniko raken nirokenga aro darangba India-ona napsrukbana man·jawa ine Tynsong parakangaha.
BSF aro police dolrang, district administration aro songni Nokmarang baksa sima ariko mangrake rakkina melie kamrangko ka·enga. Tynsong-ni agananigitade, re·anggipa chango bangladesh-oni napsrukbana jotton ka·giparang dongaha jekon BSF dolrang champengsona man·aha ine ua parakangaha. Sima ari jolo guare ka·gijagipa biaprangni naljokani gimin sing·on, sorkari iani bidingo ma·sie ra·aha aro manderangko watdapate nirokgipa dolrangko bilakdapataha ine ua aganangaha.
Iasan ong·aigija, SP, OC, district authority aro BSF-ni IG ko sima ari jolo raken nirokchina ge·etaniko Tynsong u·iataha. Maibakai niam gri napsrukbana jotton ka·genchimode raka ja·kuko de·anggen aro watani dongjawa ine Tynsong agandapangaha. Bangladesh-o songdongenggipa Khasi, Jaintia aro Garorang da·o dipet tom·tom dongenga, da·alona kingking uamangni neng·nikani ba sinjeta man·ani maming koborrangko man·soa dongkuja ine Tynsong kobor ra·timgiparangna parakangaha.
