A∙doko rama jal∙angrangko namdapatna ma∙mong sorkari Meghalaya Integrated Transport Project (MiTP)-ni kamrangko ka∙na gong 2,000 crore tangkarangko chamataha. Ian gnigipa phase-nigita rama jal∙angrangko Meghalaya a∙doko tarina World Bank baksa bakrime chamatgipa ong∙a.
A∙dokni rika cho∙anirangko namdapatna ma∙mong sorkarini tangka paisarangko chamatanina Chief Minister Conrad Sangma dingtangmancha Union Finance Minister Nirmala Sitharaman ko mittelpilangskaaha. Indakgipa dakchakaniko man∙anian a∙doko mongsonggipa rama jal∙angrangko tarina aro namdapatna dakchakangan baksana MiTP-ni skanggipa Phase-o chu∙sokatna man∙gipa kamrangko namdapatna dontonggija kamrangko ka∙naba dakchakanggen ine Sangma aganangaha.
