Da·al salni Inter Mahari Football Tournament 2024 kal·anio, skanggipa match-ko me·chik dolrang Maji aro Dawa maharini gisepo kal·angaha. Unbaksana gnipa match-ko me·asa dolrang Chambugong aro Rangsa maharini gisepo kal·angskaaha.
Skanggipa match-o me·chik dolrangni kal·anio dolgnian rakgrike kal·e chu·gimik somoio goal chipgrikna man·jae penalty tingna nangaha. Uamangni penalty tinganio Maji mahari 3-2 goal-rangchi Dawa mahariko amataha.Me·asa dolrangni gisepo Chambugong aro Rangsa mahari biltinggrike kal·anichi skanggipa half-o goal chipgrikna man·jaha.
Indake gnigipa half-ni somoiosa Chambugong maharini Tremarchwal Ch. Marak doltangna goal 1 ko chipe on·aha. Apsandaken Rangsa mahariba jotton ka·bee kal·e Nikcheng Chuman R. Marak doltangna goal 1 ko chipe on·anichi Chambugong mahari baksa apsangrik ong·atna man·aha.
Chu·gimik somoio dolgnian goal chiptaigrikna man·jae bon·kame penalty tingaona sokaha. Iani gisepon penalty tingsusaanio Chambugong maharirang goal 4 ko chipe Rangsa maharini kosako cheangaha jeon Rangsa mahari goal 3 kosan chipna man·e sirikna nangaha.
Knal salo me·chik dolrang Gabil mahari aro Dio maharini gisepo susagrikanggen aro me·asa dolrang kal·ani dongjawa ine parakataha.
